🐢Star Tortoise: तस्करांकडून जप्त 21कासवांना राजुरा वनाधिवासात आश्रय : कासव (स्टार टारटाईज) ची तस्करी प्रतिबंधित #star-tortoise

खबरकट्टा / चंद्रपूर : राजुरा -

ठाणे व मुंबई वनवृत्तात तस्कारांकडून जप्त करण्यात आलेल्या 21 कासवांना नैसर्गिक वातावरण असलेल्या चंद्रपूर वनवृतांतील मध्य चांदा वनविभागाचे राजुरा वनपरिक्षेत्रातील राजुरा, सिरसी, खांबाळा नियत वनक्षेत्रात विशेष बंदोबस्तात सोडण्यात आले. 

ठाणे व मुंबई वनवृत्तातील क्षेत्रात काही दिवसांपूर्वी चांदणी कासव (स्टार टारटाईज) ची तस्करी होत होती. आरोपींकडून ते जप्त करण्यात आले होते.

परंतु, जप्त करण्यात आलेल्या कासवांना आवश्यक असलेले नैसर्गिक वातावरण, अधिवास विदर्भातील चंद्रपूर जिल्ह्यातील काही वनक्षेत्रात असल्याने त्यांना या क्षेत्रात सोडण्याचा निर्णय घेण्यात आला. त्यानुसार विशेष बंदोबस्तात या 21 कासवांना राजुरा वनपरिक्षेत्रात आणण्यात आले. आणि या वन परिक्षेत्रातील खांबाळा, राजुरा,सिरसी या नियत क्षेत्रात सोडल्या गेले.

या मोहिमेत मुख्य वन संरक्षक एन. प्रवीण, ताडोबा क्षेत्र संचालक जितेंद्र रामगावकर, मध्य चांदा वन विभागाचे उपवनसंरक्षक अरविंद मुंढे यांच्या मार्गदर्शनात वनपरिक्षेत्र अधिकारी विदेशकुमार गलगट यांच्या नेतृत्वात सोडण्यात आले. 

यावेळी ठाणे परिक्षेत्राचे वन्यजीव वनपाल मनोज परदेशी, बचाव पथकाचे संतोष भगणे, नैमिन सौदीया, वन्यजीव वार्डन पवन शर्मा, टेभूरवाई क्षेत्र सहायक श्रीनिवास कटकू, तथा राजुरा वन क्षेत्रातील काही वनकर्मचारी उपस्थित होते.