चंद्रपूरच्या एकाच कुटुंबातील पाच जणांचा जागीच दुर्दैवी मृत्यू; १२ वर्षीय चिमुरडीचाही समावेश
चंद्रपूर | प्रतिनिधी :
समृद्धी महामार्गावर रविवारी सकाळी झालेल्या भीषण अपघाताने संपूर्ण चंद्रपूर जिल्हा शोकसागरात बुडाला आहे. चंद्रपूर शहरातील बाबुपेठ येथील जीवने कुटुंबातील पाच सदस्यांचा जागीच मृत्यू झाल्याची हृदयद्रावक घटना घडली. धामणगाव रेल्वे तालुक्यातील समृद्धी महामार्गावरील चॅनल क्रमांक १०६ जवळ हा भीषण अपघात झाला.
मिळालेल्या माहितीनुसार, बाबुपेठ येथील डी.एड. कॉलेजजवळ राहणारे जीवने कुटुंबीय रविवारी अकोला येथे एका कौटुंबिक कार्यक्रमासाठी वॅगनार कारने जात होते. मात्र, धामणगाव रेल्वेजवळ त्यांच्या कारने रस्त्याच्या कडेला उभ्या असलेल्या कंटेनरला भरधाव वेगात मागून जोरदार धडक दिली. धडक इतकी भीषण होती की कारचा पुढील भाग पूर्णपणे चक्काचूर झाला आणि कारमधील पाचही जणांचा जागीच मृत्यू झाला.
अपघातातील मृतांची नावे :
आरती जीवने (वय ४०)
भास्कर जीवने (वय ५७)
महादेव जीवने (वय ४२)
लता जीवने (वय ४३)
त्रिशा जीवने (वय १२)
हे सर्वजण डी.एड. कॉलेजजवळ, बाबुपेठ, चंद्रपूर येथील रहिवासी होते.
अपघाताची माहिती मिळताच महामार्ग पोलीस, स्थानिक पोलीस, रुग्णवाहिका आणि आपत्कालीन बचाव पथक तातडीने घटनास्थळी दाखल झाले. कारमध्ये अडकलेल्या मृतदेहांना मोठ्या प्रयत्नांनी बाहेर काढून शवविच्छेदनासाठी शासकीय रुग्णालयात पाठविण्यात आले.
प्राथमिक तपासानुसार भरधाव वेगामुळे वाहनावरील नियंत्रण सुटून उभ्या कंटेनरला धडक बसल्याचा अंदाज व्यक्त करण्यात येत आहे. मात्र, अपघाताचे नेमके कारण शोधण्यासाठी पोलीस अधिक तपास करत आहेत.
या हृदयद्रावक दुर्घटनेमुळे चंद्रपूरच्या बाबुपेठ परिसरासह संपूर्ण जिल्ह्यावर शोककळा पसरली असून, समृद्धी महामार्गावरील वाढत्या अपघातांमुळे पुन्हा एकदा महामार्ग सुरक्षिततेचा प्रश्न ऐरणीवर आला आहे.
ठळक मुद्दे
🔴 धामणगाव रेल्वेजवळ समृद्धी महामार्गावरील चॅनल क्रमांक १०६ येथे भीषण अपघात.🔴 वॅगनार कारची उभ्या कंटेनरला जोरदार धडक.🔴 चंद्रपूरच्या बाबुपेठ येथील एकाच कुटुंबातील पाच जणांचा जागीच मृत्यू.🔴 मृतांमध्ये १२ वर्षीय त्रिशा जीवने या चिमुरडीचाही समावेश.🔴 अकोला येथे कौटुंबिक कार्यक्रमासाठी जात असताना काळाचा घाला.🔴 अपघाताच्या नेमक्या कारणांचा पोलीसांकडून सखोल तपास सुरू.
💐 खबर कट्टा परिवाराकडून दिवंगतांना भावपूर्ण श्रद्धांजली.
